منة شلبي
13-10-2009 - 11:09 am

اهدي اليكم بعض الابوذيات 0000 اتمنى ان تعجبكم



غيابك خلخل اعضامي .. وهدهن
واجر حسرات ببعادك .. وهدهن
آلي دمعات لو ابجي .. وهدهن
تفيض اليابسة ونغرك سويه

ابيك آنة وابد ماكول.. مابيك
يل كلك محنة وشين .. مابيك
غبت عني واكول شبيك .. مابيك
من اغيبن هم يظل بالك عليه


اشكثر خوان راحت ...... ماردتلي
انشلع كلبي وجبدتي .... ماردتلي
غير الخير انته ....... ماردتلي
شح الخير من فركاك الية



ذهب صافي طبعنة...... ما صدينة
وابد عن اليودنة .....ما صدينة
تصيد الناس واحنة.... ما صدينة
رغم نفس المكان انذب سوية




وكت وياي ياصاحب ولك مال

وكضيت العمر لاناجح ولكمال

حتى الجان يوصلني ولك مل

كطع جيته ولا ينشد عليه






اوصي الراح والرد من رساله
شعجب شبساع ينسى من رساله
مشى وودا رساله من رساله
جهنم بالظرف وداها اليه

الي احباب اعلمودك ودعوني
طحت ما شفت واحد ودا عوني
انا بعرسك دعوني ودعوني
نفسهم جانوا يشمتون بيه


]بغرامك تيهت اصلي وجدي
لان ماتعرف مزاحي وجدي
اباب اهلك لريد اكعد واجدي
بلكت ينكسر كلبك عليه


حبيبي الشوك لا تكطع وصاله
الك بالكلب كم غرفه وصاله
نجوى تروحلك فدوه واصاله
ولجل عينك لطيفه التونسيه


عكب طيب الليالي مرمرني
سنين السعد راحن مر مرني
كوس الشهد زادي مامرني
حنضل صارن بفركا الاحباب

غاب الكمر من شافك ولا هل
ولغيرك ما نزل دمعي ولا هل
مالي دار من بعدك ولا هل
عزيز ويصعب فراكك عليه

شعره مخربط مفلفل فلافل
وكلبي مجلب بكلبة فلا فل
اذا يتغدة محبوبي فلافل
لو ياكل كباب شلون بيه

لاجل عينك اصير رماد وانذر
ولشوفتك اطش جكليت وانذر
اذا فد يوم اصيرن حكم وانذر
اشيل احمر طرد مو بيك بيه


ذبل هرش الكلب بعدك و خاوة
و طمع ما ردت من عندك و خاوة
الفخر مو للذي عاشر و خاوة
الفخر و الطيب لليذكر خويه


التعليقات (8)

ام بسملة
ام بسملة
19-10-2009 - 05:04 am


حبيبتى منه بالرغم ان نص الكلام مفهمتوش لكن الحبه اللى فهمتهم حلوين هههههههههههه تسلمى يامنه


منة شلبي
منة شلبي
21-10-2009 - 10:22 pm


منورة الموضوع هاي بس بداية لان ما اعرف أنزل مواضيع بصراحة كنت خايفة يصير غلط بالموضوع فسويت مواضيع بسيطة يارب تعجبكم وهية بالهجة العراقية لأن آني عراقية والله منتدياتنة كولهة مواضيعهة بس علوضعية الي بالعراق والمعانات يعني صراحة جو مختنك كولش واحنة عوائل محافضة يعني الفتاة متطلع بس للدراسة فكان النت هو المتنفس الوحيد النة نتواصل وية ناس طيبن خاصة انتو كلكم ناس مبدعين من ادخل هذا المنتدى حاسة حالي الف الدنيا ....سوري طولت عليكم نسيت حالي


ملكة في قلب زوجي
ملكة في قلب زوجي
21-10-2009 - 10:29 pm


هلا بيج منة نورتينا ياقمر حبيبتي اعتبرينا هنا كلنا اخواتج وصديقاتج اني هم عراقية بس عايشة بالاردن صارلي 4 سنين تشرفت بيج حبي وطبعا الابوذيات تخبل تسلم ايدج عليهن هنا اكو عراقيات بس موهواية بس ويانة من صدك راح تلفين الدنيا كلها واحنا موجودين دايما هنا لان النت هو المتنفس الوحيد النا كلنا بس الكم بالعراق الله يحفظكم يارب


منة شلبي
منة شلبي
22-10-2009 - 08:06 pm


هلالالالالاو ملكة شلونج يروحي والي الشرف أكثر حياتي انتي منورة الموضوع بمرورج المميز تحياتي الج ولشخصج الراقي


ام مريم
ام مريم
22-10-2009 - 09:07 pm


هلا بيج منة شلونج قلبي هلا ببنت بلادي الغالي شلونج عيوني وعاشت اييج ابوذيات حلوة بس هنا صعب الكل يفهموها لان اللهجة العراقية صعبة كلش وهلا بيج منورة عيوني


ام بسملة
ام بسملة
22-10-2009 - 09:15 pm


حبيبتى يامنه منورانا ياقمر ومنوره المنتدى ولا يهم بكره هنعلمك تتكلمى مصرى زينا زى ملكه فى قلب زوجها ما تعلمت ودلوقتى بتنسى العراقى بس شكلك كده هتخليها ترجعلوا تانى ههههههههههههههههههههه واحنا هنا اخواتك غاليتى الله يحميكى لأهلك يارب


ebtesam
ebtesam
28-10-2009 - 01:33 am


حبيبة قلبي منه انا كمان أكتر الكلام مش فهمته بس تسلمين يا قمر وتسلم إديكي يا عسلية


أضف تعليق

زائر