ام ملك
06-12-2008 - 04:18 pm



اولا وقبل اي حاجة كل سنة وانتم طيبين
ويارب السنة الجاية نكون كلنا في عرفات



حبيباتي ..
دي طريقتين من أحسن الطرق اللي انا جربتها
في إشعال الفحم
والاتنين احسن من بعض.

الطريقة الاولى:
اختاري 5 أو 6 قطع فحم كبيرة
وحطيها على النار على البوتاجاز
وكل ما تحمر من ناحية اقلبيها على ناحية تانية
لغاية ما تحمر من كل الجهات .
حطي في الشواية نص كمية الفحم اللي هتستخدميها
وبعدين رصي قطع الفحم المشتعلة عليهم
بس يكونو متفرقين (بعيد عن بعض)
وبعدين حطي باقي كمية الفحم عليهم
وبمروحة الشوي هَوّي بيها جامد
لغاية ما تطلع نار من قطع الفحم المشتعلة
وقلبيهم كل شوية لغاية ما تلاقي الفحم كله احمر
طفي النار برشة من بخاخ الماء
وحطي الرف اللي هتشوي عليه
ورصي اللحمة يا قمر.



الطريقة التانية:
رصي الفحم كله في الشواية
وصبي عليه حوالي نص كوب جاز
بحيث ان الجاز يوصل لمعظم قطع الفحم
وولعي كبريت وحطيه على الجاز
هتلاقي النار اشتعلت علطول في الفحم
سيبيها لغاية ما تهدا لوحدها
لانها لما تهدا لوحدها يبقى الجاز تبخر
علشان ميكونش له رائحة في اللحم.
بس كده.


شوية ملحوظات..
* افردي الفحم بحيث يكون في مستوى واحد
وميكونش في جزء أعلى من جزء.
* وانت بتشوي مش المفروض تطلع نار
لانها هتحرق لك اللحمة
من غير ما تسويها،
فلما تلاقي نار رشي عليها ببخاخ الماء.
* لو بتشوي لحمة او دجاج صبي عليه من سائل
التتبيلة وهي بتتشوي علشان متبقاش ناشفة.



وكل سنة وانتم طيبين
ربنا يتقبل منا ومنكم صالح الاعمال.


التعليقات (4)

mona cherif
mona cherif
07-12-2008 - 10:25 am


صح ما قولتي وشكرا لك


ام ملك
ام ملك
17-12-2008 - 10:33 pm


الشكر لمرورك الجميل منمن


انسام
انسام
06-12-2009 - 07:24 pm


مشكورة كتير يا قمر على فكرة احنا دايما في كل عيد نستعمل الطريقة الاولى


أضف تعليق

زائر